Градоначалникот на општина Гевгелија Иван Франгов имаше средба со претставниците на Центарот за обука Епиморфотики од Кукуш на која стана збор за соработката во врска со престојното аплицирање до Интерег 4А програма за прекугранична соработка со Република Грција.

Општина Гевгелија преку оваа програма во изминатиот период реализираше повеќе заеднички проекти со Поликастро, Кукуш, Бојмица, Ексаплатанос, Аминдео и други погранични општини во соседна Грција. Дел од овие проекти, како што беше обуката на невработени лица и вработени во комуналната сфера, беа реализирани во организација на Центарот за обуки од Кукуш. Пред престојното отворање на Интерег 4А програмата за оваа година интерес за продолжување на соработката пројавија општините Поликастро, Бојмица и Кукуш.

Според директорот на Центарот за обуки Панос Амиридис програмата ќе понуди можности за аплицирање на неколку теми – економски развој, човечки ресурси, обуки за развој на туризмот. Оттука и потребата, пред отворањето на Интерег 4А програмата, партнерите од двете општини да ги утврдат и усогласат своите приоритети. Од страна на градоначалникот Франгов беше најавено дека за општина Гевгелија од посебен интерес се проектите за изградба на патот од новоизградениот мост до македонско-грчката граница, уредувањето на крајбрежјето на Вардар во пограничниот регион, како и отворање на заедничка канцеларија за посредување при вработувањето. За овие проекти согласност веќе имаме од општините Поликастро и Бојмица, нагласи Франгов.