Советот на Општина Гевгелија, на вчерашната 57. седница, ги усвои Завршната сметка на Буџетот на Општина Гевгелија за 2024 година со Извештајот за работењето на Општина Гевгелија во 2024 година. Во текот на минатата година, вкупно реализираните приходи на Буџетот на Општина Гевгелија изнесуваат 672.235.552 денари или 99,19 % од планираниот буџет во вкупен износ од 677.730.678 денари. Даночните приходи, во износ од 166.264.326 денари, се натфрлени за 112,18%, а натфрлување од 247,34% е остварено и кај капиталните приходи, во износ од 81.116.963 денари. Неданочните приходи, во износ од 16.316.697 денари, се остварени со 60,00%, приходите од трансфери и донации, во износ од 402.587.657 денари, се реализирани со 86,84%, додека домашното задолжување од 5.949.936 денари или 100,00%. Приходите на Основниот буџет се реализирани во висина од 322.181.345 денари, што претставува натфрлување за 107,02% од планираните приходи, во висина од 301.040.568 денари. Извори на приходи на Основниот буџет се даночните приходи- 166.264.326 денари, неданочни приходи- 3.583.924 денари, капиталните приходи- 81.116.936 денари и трансфери и донаци- 71.216.159 денари.
Вкупно реализираните расходи на Буџетот на Општина Гевгелија за 2024 година во висина од 644.308.154 денари изнесуваат 95,07% од вкупно планираните расходи за 2024 година, односно 677.730.678 денари. Значајно е да се одбележи дека реализираните капитални расходи на Основниот буџет во висина од 97.221.415 денари, во споредба со планираните 127.905.200 денари, учествуваат со 98,97%. Тоа, несомнено, ја потврдува развојната компонента на инвестиционите активности, реализирани во текот на минатата година. Додека, во вкупните расходи, капиталните расходи учествуваат со реализација од 118.298.198 денари или 92,49%, во споредба со планираните 127.905.200 денари.
Осврнувајќи се на минатогодишното финансиско работње на Општина Гевгелија и остварената буџетска реализација, градоначалникот на општина Гевгелија, Андон Сарамандов, истакна:
– Реализацијата на Основниот буџет на Општина Гевгелија, од којашто зависи спроведувањето на планираните активности и програми во текот на годината е посебно значајна за функционирањето на локалната самоуправа. 2024 година ја завршивме со одлична реализација на Основниот буџет, како во делот на приходната, така и во делот на расходната страна, со што се продолжува трендот со завршување на сите активности што беа планирани. Се надевам дека овој тренд со високи проценти на извршување ќе продолжи и следните години. Во делот на приходната страна е евидентно зголемување по сите ставки, како резултат на зголемената стопанска активност. Во делот на расходната страна, имаме висок и би рекол рекорден процент кај капиталните расходи, затоа што успеавме да реализираме поголем број проекти во градот и во населените места.
– Во 2024 година, беше изграден модерниот урбан парк во градот Гевгелија, оплеменет рекреативниот парк кај „Топлик“, изградена новата сообраќајница до Милци, започна асфалтирањето улицата „Св. Климент Охридски“, односно Западниот булевар, извршено е партнерно уредување во дворот и уредување на спортскиот терен во ООУ „Крсте Мисирков“, како и реконструкција на санитарните јазли и целосно реновиран ходникот со нови плочки во Училиштето. Исто така, во 2024 година започна реконструкцијата на спортската сала ДТВ „Партизан“, a целосно е изграден новиот пазар во Миравци. Во делот на комуналната инфраструктура изградени се нов водоводен и канализационен ситем во Урбан блок 5, кај старата Касарна, нов канализационен систем во централното градско подрачје на улицата „7 Ноември“, а доизградена е фекалната канализација во населеното место Давидово. Целосно е заменета подземната инфраструктура на улицата „Ѓоко Тутушев“, а поставена е и атмосферска канализација на улицата „Ѓорги Стамов“ во Гевгелија. За најмалите и младите во општина Гевгелија, во населените места Мрзенци, Кованец, Мрзенци и во ООУ „Владо Кантарџиев“ се изградени детски катчиња со урбана опрема за играње. Продолжи и веќе е во завршна фаза доизградбата на Детската градинка „Сончогледи“ во Гевгелија, а со нова тартан-подглога уредени се повеќе спортски терени во градот и населените места.
– Реализирани се и повеќе градежни активности за подобрување на патната инфраструктура на подрачјето на Општина Гевгелија. Покрај одличната реализација на Буџетот за 2024, посебно задоволство ми претставува што, за првпат, после долги години, на крајот од годината, има повеќе средства на жиро-сметката на Основниот буџет од тековните обврски што ги има Општина Гевгелија, околу 59.000.000, а обврските се 54.650.000 денари, со што, на некој начин, се прекина праксата за непродуктивни трошоци, додека остануваат повеќе средства за капитални проекти. Верувам дека во наредниот период и во наредните години ќе се задржи трендот за реализација на повеќе капитални проекти од интерес на граѓаните, истакна градноаначалникот Андон Сарамандов на вчерашната седница на Советот на општина Гевгелија.
powered by Borlabs Cookie 