Буџетот на Општина Гевгелија за 2026 година е утврден на вкупен износ од 887.172.293 денари. Одлуката за негово усвојување беше донесена со мнозинство гласови на првиот дел од 5. седница на Советот на Општина Гевгелија.
Приходите на Основниот буџет учествуваат со 446.289.554,00 денари или 50,30 проценти од вкупниот буџет, од кои редовните приходи на општината се планирани во износ од 290.668.217,00 денари, додека капиталните приходи од Буџетот на Република Македонија изнесуваат 155.621.337,00 денари или 34,87 проценти. Приходите од дотации се планирани во износ од 388.210.101,00 денари или 43,76 проценти, приходите од донации изнесуваат 29.947.638,00 денари или 3,38 проценти, а приходите од самофинансирачки активности се предвидени во износ од 22.725.000,00 денари и учествуваат со 2,56 проценти во вкупните приходи.
Во вкупната структура, даночните приходи се планирани во износ од 210.307.508,00 денари, што претставува 23,71 проценти, неданочните приходи изнесуваат 25.729.000,00 денари или 2,90 проценти, капиталните приходи се планирани на 28.650.000,00 денари или 3,26 проценти, додека 70,16 проценти или 622.485.785,00 денари припаѓаат на трансфери и донации.
Во билансот на приходи на Основниот буџет, даночните приходи се планирани на 210.307.508,00 или 47,12%, неданочните приходи учествуваат со 3.850.000,00 или 0,87 проценти. Додека, со 6,42 процени или 28.650.000,00 денари учестуваат капиталните прходи, а 45,59 проценти припаѓаат на трансферите и донациите или 203.482.046,00 денари.
Вкупните расходи во Основниот буџет изнесуваат 446.289.554 денари и се распределени така што за плати и надоместоци се планирани 66.479.220,00 денари, додека за стоки и услуги се наменети 78.830.100,00 денари. За субвенции и трансфери се предвидени 65.314.851,00 денар, за каматни плаќања се издвоени 4.300.000,00 денари, а за отплата на главница се планирани 16.256.019,00 денари. Капиталните расходи изнесуваат 214.409.364,00 денари или 48,04 проценти од вкупните расходи во Основниот буџет. За резерви и недефинирани расходи се предвидени 700.000,00 денари.
Со усвојувањето на Буџетот за 2026 година, Советот на Општина Гевгелија обезбеди стабилна финансиска рамка за реализација на тековните обврски и капиталните инвестиции, со фокус на одржлив локален развој и унапредување на квалитетот на живот на граѓаните. Во таа насока, градоначалникот на општина Гевгелија, Андон Сарамандов, потенцира:
– Изминатите четири години, во рамки на моето работење, буџетот претставуваше клучен документ и патоказ за континуиран развој, како и одговорно, транспарентно и стабилно управување со јавните средства. Водејќи се од тоа дека буџетот припаѓа на секој од нас, процесот на донесување вклучува одговорно планирање и активна вклученост на граѓаните, за што упатувам искрена благодарност до секој поединец кој даде придонес во неговото креирање.
Притоа, Градоначалникот ја нагласи реализацијата на новите приоритети во Буџетот за 2026 година:
– Како резултат на нашето успешно работење и одличната реализација во изминатите три години, буџетот е зголемен, но пред сè реално проектиран и ќе го продолжи континуитетот за развој на Општина Гевгелија, а притоа ќе значи и директна грижа за граѓаните. Со Буџетот за 2026 година ставаме фокус на вложувања во трајни и одржливи решенија. За нормално функционирање, организација на бројни настани, како и промоција и афирмација на градот, продолжуваме со поддршка кон здруженијата на граѓани, спортски и културни друштва, како и граѓански организации кои се носители на ваквите активности. Како локална самоуправа, остануваме цврсто посветени на визијата за Гевгелија како урбана, модерна и економски стабилна општина.
