Општина Гевгелија со свој штанд учествуваше на годинешниот 46. Меѓународен саем за туризам во Белград, Република Србија. Прифаќајќи ја поканата на Агенцијата за промоција и развој на туризмот на Република Македонија, Општина Гевгелија на оваа престижна туристичка манифестација ги промовираше туристичките потенцијали на гевгелиското поднебје. Со самото учество, локалната самоуправа ја продолжи својата заложба за промоција и развој на туристичките потенцијали преку туристичката платформа на Општина Гевгелија “Gevgelija Tourism – Spice up the journey”.
На Меѓународниот саем за туризам во Белград, градоначалникот на општина Гевгелија, Андон Сарамандов, разговараше со директорката на Агенцијата за промоција и поддршка на туризмот, Билјана Стефановска, за можностите што Гевгелија континуирано ги нуди на туристите. Истовремено, се разговараше и за понатамошната соработка. Сарамандов оствари средба и со гевгеличанецот Васко Шутаров, директор на Културно-информативниот центар на Република Македонија во Белград. Акцентот беше ставен на соработката помеѓу новоотворениот КИЦ во Белград и Општина Гевгелија како можност за културно поврзување и заемен развој на културните и туристички потенцијали. Во текот на саемската манифестација, а по пројавениот интерес на српските медиуми, градоначалчникот Андон Сарамандов на телевизијата „Туристичка призма“ и за информативната агенција „Танјуг“ ја презентираше туристичката платформа на Општина Гевгелија.
На 46. Меѓународен саем во Белград, Општина Гевгелија заедно со Општините Дојран, Охрид и Струга, беа дел од репрезентативниот штанд со којшто се промовираа македонските туристички потенцијали. Притоа, од АППТ беше посочено дека македонскиот туристички сектор ја збогатува понудата за транзитните туристи, особено од Србија. Со единствена цел – да останат ден повеќе во државата, пред сè, поради веќе пројавениот интерес за посета на винариите во винскиот регион, во Дојран и Гевгелија, како и културните знаменитости што се наоѓаат крај автопатот Е-75.
