При работната посета во Гевгелија, министерот за култура и туризам, Зоран Љутков, заедно со градоначалникот на општина Гевгелија, Андон Сарамандов, направија увид на Старата чаршија. Целта на увидот беше поради претстојната реставрација и подобрување на инфраструктура. Имено, Владата на Република Македонија инвестираше 40.675.095 денари за комплетна реставрација на Старата чаршија, со што Гевгелија ќе добие нова визуелна и функционална димензија. Со овој проект, Општина Гевгелија аплицираше на Јавниот повик од Министерството за локална самоуправа за подобрување на условите за живот во сите општини во Македонија.
Како што нагласи министерот Љутков, со реализацијата на овој инвестициски зафат, ќе се подобри инфраструктурата и ќе се создаде простор за културни настани и уметнички проекти, со што ќе се негува традицијата и ќе се поттикнат нови културни трендови.
Во рамките на посетата на Гевгелија, министерот Љутков ги посети НУ Музеј – Гевгелија, Библиотеката „Гоце Делчев“, винаријата „Маркудов“, како и црквата „Свети Атанасиј“ во село Габрово. Притоа, се реализираше и кафе-средба со претставници од областа на туризмот, на којашто беа разгледани сите нови можности за развој и соработка со цел создавање нова визија за иднината на туристички сектор во Министерството за култура.
