Советот на Општина Гевгелија на 16. седница, којашто се одржа на 22 октомври 2026 година, разгледа и усвои повеќе акти од значење за функционирањето на Општината, меѓу кои измените и дополнувањата на Буџетот за 2026 година, повеќе општински програми, финансиските планови на општинските училишта и јавни установи, како и одлуки и информации од областа на локалната инфраструктура, спортот, културата и социјалната заштита.
Во врска со финансиските документи, на седницата беа разгледани измените и дополнувањата на Буџетот на Општина Гевгелија за 2026 година, како и Кварталниот извештај за извршување на Буџетот за периодот од 1 јануари до 30 септември 2026 година, за кој беше предложен заклучок за усвојување.
Исто така, беа усвоени измените и дополнувањата на Програмата за уредување на градежното земјиште во општина Гевгелија за 2026 година, Програмата за изградба, реконструкција, рехабилитација, одржување и заштита на општинските патишта и улици, како и Програмата за активности на Општина Гевгелија во областа на образованието за 2026 година.
Усвоени беа и измените и дополнувањата на Програмата за финансирање на спортските активности во општина Гевгелија за 2026 година, Програмата за одбележување значајни настани и истакнати личности со спомен-обележја во општина Гевгелија за периодот 2024–2029 година, како и Програмата за финансиска поддршка на невладиниот сектор од општина Гевгелија за организирање програмски активности во 2026 година.
На седницата беше донесена и Одлуката за начинот на управување и користење на спортските терени и објекти во сопственост на Општина Гевгелија, со која се уредува начинот на нивното користење и управување.
Во делот на образованието и работата на општинските јавни установи, беа усвоени измените и дополнувањата на финансиските планови за 2026 година на СОУ „Јосиф Јосифовски“- Гевгелија, ООУ „Владо Кантарџиев“- Гевгелија, ООУ „Крсте Мисирков“- Гевгелија, ООУ „Ристо Шуклев“- Негорци, ООУ „Климент Охридски“- Миравци, ООМУ „Васо Карајанов“- Гевгелија, ЈОУ Дом на култура „Македонија“- Гевгелија, ЈОУ Пионерски дом „Јосип Броз- Тито“- Гевгелија и ЈОУДГ „Детска радост“- Гевгелија.
Беше дадена и согласност на Финансискиот извештај на ЈПКД „Комуналец“- Гевгелија за вториот квартал од 2026 година, кој се однесува на периодот од 1 април до 30 јуни.
На дневниот ред беа и информации за состојбата со хоризонталната и вертикалната сообраќајна сигнализација во општина Гевгелија, како и за состојбата со дивите депонии. Овие прашања се однесуваат на уредувањето на сообраќајот и одржувањето на јавната чистота, како значајни сегменти од секојдневното функционирање на општината.
Разгледани беа и информациите од ЈУ Меѓуопштински центар за социјална работа- Гевгелија за состојбата со изграденоста на архитектонските бариери за лицата со посебни потреби, како и за состојбата со жртвите на семејно насилство. Во рамките на седницата беше разгледана и информацијата од НУ Завод за заштита на спомениците на културата и музеј- Струмица за состојбата со заштитата на историските и градителските традиции во општина Гевгелија.
Со дневниот ред на 16. седница беа опфатени прашања од повеќе области на локалното работење, со акцент на буџетското планирање, инфраструктурниот развој, образованието, спортот, културата, работата на општинските јавни установи, сообраќајната сигнализација, управувањето со отпадот и социјалната заштита.
