Детската ликовна летна школа при ЈОУ Пионерски дом „Јосип Броз Тито“- Гевгелија официјално започна со работа и ќе трае до 3 јули 2025 година. Во текот на овие летни денови, младите учесници ќе имаат уникатна можност да ги развиваат своите ликовни вештини и креативност под стручно менторство на реномираниот уметник м-р Александар Јанев. Преку разни техники и ликовни изрази, децата ќе се запознаат со светот на уметноста и ќе создаваат свои оригинални дела, кои ќе ја доловат нивната имагинација и талент.
Завршната изложба на создадените ликовни дела ќе биде поставена во просториите на Пионерски дом- Гевгелија и ќе се отвори на 4 јули 2025 година. Оваа изложба е дел од богатата програма за „Гевгелија град на културата 2025“ и ќе биде одлична можност за граѓаните и љубителите на уметноста да ги видат резултатите од трудот и инспирацијата на младите ликовни творци.
Во рамки на манифестацијата„Гевгелија град на културата 2025“, Општината во тесна соработка со локалните институции од областа на културата посебно ги истакнува и поддржува младите таленти. Оваа иницијатива има за цел да им обезбеди простор и можности за развој и изразување на нивниот креативен потенцијал, со што се гради културна иднина на градот, која ќе биде богата и инспиративна за сите генерации.
powered by Borlabs Cookie 