На 26 август 2025 година, Уметничката галерија „Амам“ во Гевгелија го отвори својот простор за Изложбата на Филип Цветковиќ „Пчелна уметност – Apis Art“. Бројни културни работници, ликовни уметници, љубители на уметноста, дипломатски кор и функционери на државно и локално ниво искажаа интерес за Изложбата, присуствувајќи на отворањето и разгледувајќи ги изложените делата во Галеријата.
Свеченото отворање го означија директорот на НУ Музеј-Гевгелија, Саша Јованов, и директорката на ЈОУ Дом на култура „Македонија“- Гевгелија, Мирјана Массетти кои ја реализираа оваа изложба во Гевгелија за манифестацијата „Град на култура“ во соработка со Македонскиот културно-информативен центар во Белград, Р. Србија.
Критички осврт на делата на Цветковиќ даде директорот на МКИЦ во Белград, д-р Васко Шутаров, кој истакна:
Визуелните градации во естетски префинетите уметнички дела на д-р Филип Цветковиќ, потцртани со жолто и со црно, во својата едноставна приемчивост и привлечност за окото, содржат една длабока филозофска нишка во размислата- од каде почнавме, каде одиме, до каде стасавме?! Од спокојот и складот со природата во себе и околу себе, преку отпорот, исчудувањето, тескобата, гневот и бесот, моделите во делата на Филип Цветковиќ се одраз на еден длабок цивилизациски крик, одраз на еден длабок јаз помеѓу природата и човековата цивилизација во 21 век! Во 15 шестаголни дела од циклусот „Пчелна уметност“, д-р Филип Цветковиќ манифестира една успешна приказна за интегрирање на модерната наука и модерното во уметноста, повикува на ангажираност и на науката и на уметноста за спас и враќање кон законитостите и хармонијата во природата- и сето тоа со една уметничка естетика, одмерена и отмена, каква што приличи на еден модерен научник, истражувач, уметник и човек, каков што е и тој самиот лично.
Во своето обраќање, авторот Цветковиќ рече:
– Чест ми е што во Гевгелија, која ја носи титулата „град на култура“ се изложени моите дела низ кои е прикажана уметноста инспирирана од пчелниот свет, а која води низ светот на креативноста и симболиката што ја имаат пчелите во нашиот живот.
Меѓу гостите на отворањето особено внимание предизвика присуството на амбасадорот на Босна и Херцеговина во Македонија, г. Драган Јачимовиќ, чија поддршка ја даде во знак на регионална културна соработка и емоционалната поврзаност со Македонија и Гевгелија. Неговото присуство, заедно со излагањето на д-р Шутаров, ја нагласи важноста на врските меѓу институциите и уметниците во Македонија и поширокиот регион.
Изложбата „Пчелна уметност – Apis Art“ на д-р Филип Цветковиќ не е само визуелно доживување, туку силна симболична порака за кревкиот однос помеѓу човекот и природата. Преку уникатен ликовен израз и научна инспирација, делата го повикуваат гледачот на размислување, будат еколошка свест и нудат пат кон хармонија со светот околу нас. Гевгелија, како „град на културата“, уште еднаш покажа дека е отворена сцена за современи уметнички гласови кои зборуваат за глобални теми, а истовремено создаваат мостови на регионална соработка и културна размена. Настанот не само што го збогати локалниот културен живот, туку и потврди дека уметноста останува важен медиум за промени, дијалог и поврзување.
powered by Borlabs Cookie 