Oпштина Гевгелија ги известува жителите на општина Гевгелија дека остануваат уште 16 слободни места за добивање субвенции за набавка на велосипед. Од објавувањето на Повикот за 2025 година, по донесената Одлука на Советот на Општина Гевгелија, досега барања за субвенции поднеле 84 граѓани.
Право на аплицирање имаат граѓаните на општина Гевгелија, кои купиле велосипед во периодот од 1 април сè до потрошувањето на средствата во висина од 500.000 денари од Општинскиот буџет за 2025 година предвидени за оваа намена, освен вработените во општинската администрација и членовите на нивните семејства, како и лицата кои минатите години добиле субвенции за велосипед.
Аплицирањето за субвенции за набавка на велосипеди се врши во зградата на Општина Гевгелија, секој работен ден од 08:00 до 16:00 часот. За добивање субвенции за набавка на велосипед е потребна следнава документација:
– копија од важечка лична карта или патна исправа,
– копија од трансакциска сметка,
– изјава за давање согласност за користење лични податоци,
– потврда од Општина Гевгелија дека е платен данокот за имот за станбениот објект во кој живее,
– доказ (фискална сметка или фактура) дека велосипедот е купен од трговци кои дејноста ја обавуваат на подрачјето на општина Гевгелија.
Барањата од Јавниот повик ќе бидат разгледани по редослед според датумот и времето на пристигнување, односно според принципот „прв дојден, прв услужен“.