На 23 и 24 август 2025 година, во спортската сала „26 Април“ во Гевгелија се одржа Вториот по ред пинг-понг турнир со хуманитарен карактер „Gevgelija Open 2025“, во организација на Пинг-понг клубот „Гевдион 2023“. Општината беше домаќин на 100 натпреварувачи од 20 клуба од Македонија и странство. Годинава, учестуваа претставници од шест различни земји: Србија, Босна и Херцеговина, Бугарија, Турција, Албанија и Иран. Турнирот потврди дека иницијативата започната во 2023 година од стрна на ОО Црвен крст- Гевгелија прераснува во традиција со меѓународен карактер, што го позиционира градот на спортската мапа за пинг-понг натпреварувања.
Свеченото отворање на спортскиот настан беше означено во присуство на градоначалникот на општина Гевгелија, Андон Сарамандов. Во своето обраќање, ги охрабри спортистите со желби за успешно натпреварување, а на тренерите, судиите, волонтерите и посетителите им посака пријатно искуство и уживање во спортската атмосфера. На гостите од странство им упати топло добредојде во нашата гостопримлива Гевгелија. Притоа, на членовите на Пинг-понг клубов „Гевдион“ им оддаде признание што за кратко време успеа да ја промовира оваа динамична и возбудлива игра преку повеќе успешни настани.
– Ентузијазмот, посветеноста и љубовта кон спортот се главен мотив локалната самоуправа целосно и во континуитет да ги подржува ваквите настани. Со задоволство најавувам дека наскоро Пинг-понг клубот „Гевдион“ ќе добие и свој дом за тренинзи во реконструираната спортска сала на ДТВ „Партизан“, што сметам дека ќе придонесе уште повеќе млади да се вклучат и да ја засакаат оваа спортска дисциплина- истакна Сарамандов.
Во текот на двата дена, беа одиграни повеќе категории во рамки на 2. издание на Меѓународниот пинг-понг настан „Gevgelija Open 2025“. Исто така, во рамки на програмата се одржа и хуманитарен турнир организиран од Општинската организација на Црвениот крст- Гевгелија, со кој уште еднаш се покажа дека спортот и солидарноста одат заедно. Крајот на настанот беше означено со свеченото доделување на пехарите, медалите, дипломите и наградите за најуспешните учесници, со што беше заокружено уште едно успешно издание на Tурнирот.
На Open турнирот, првото место го освои Никола Михајловиќ од Босна и Херцеговина, второпласиран беше Драган Џорџевиќ од Србија, а третото место го поделија Сина Кејхан од Иран и Драган Јовиќ од Србија. На петтата позиција се пласираа Амелија Уце Николов од Македонија, Бранислав Миленковиќ од Србија, Борче Талевски од Македонија и Игор Живковиќ од Србија.
На Македонскиот турнир најдобар беше Сашо Љамов од ППК- Радовиш, второто место му припадна на Борис Секулов од ППК „Астраион“, а третата позиција ја поделија Горазд Ристевски од ППК „Студент“ и Филе Матевски од ППК „Вардар“. Во конкуренцијата двојки најдобри беа Младеновски и Уце. Второто место го освоија Секулов и Милев, додека третопласирани беа Јакимовски и Васевски.
Во младинската категорија до 19 години најдобар беше Андреј Васевски од Куманово, второпласиран Јаков Јакимовски од Куманово, а третото место го поделија Дамјан Петровиќ од Дебар Маало и Kuzey Mehmet Alev од Турција. Во рамки на традиционалниот хуманитарен турнир, најуспешен беше Борче Станков, второ место освои Ѓорге Бојмалиев, а третата позиција ја поделија Кристијан Бојмалиев и Ристе Бојчев.
Овој спортски настан е поддржан од Општина Гевгелија преку Програмата за финансирање на спортските активности во општина Гевгелија за 2025 година.
