Голем интерес, топла атмосфера и врвни музички интерпретации го одбележаа свечениот концерт што на 27 ноември се одржа во ООМУ „Васо Карајанов“- Гевгелија, посветен на 255-годишнината од раѓањето на Лудвиг ван Бетовен. Настанот, организиран во рамките на програмата „Гевгелија град на културата за 2025 година“, уште еднаш ја потврди моќта на класичната музика да ги обедини сите генерации во љубопитност, восхит и почит кон големите мајстори. Салата беше исполнета до последно место, а секоја изведба беше пречекана со неподелен интерес. Публиката имаше можност да проследи богата програма која ги поврза различните творечки етапи на Бетовен во еден уметнички континуитет- од нежните минијатури до посложените форми што го означуваат зрелото создавање на композиторот.
На концертот блеснаа учениците, чие присуство на сцената донесе свежина и искреност. Лазар Мијов од класата на професор Душко Лазаров настапи со „Сонатина во G-dur, Anh. 5- втор став“, претставувајќи ја деликатната поетика на раното творештво на Бетовен. Илија Димов, ученик на професор Влатко Сапламаев, со сигурност и музикалност ја исполни „Сонатина во F-dur, Anh. 5, бр. 6- прв став“. Теодора Шутарова го донесе еден од најпознатите бисери на клавирската литература- „За Елиза“, како ученик од класата на професор Александар Лазаров, која ѝ даде нова емоционална боја на ова вечнo дело.
Другите композиции од програмата им припаднаa на наставниците- музичари чие мајсторство ја збогати концертната вечер со поинаква магија. Професорката Маја Зафирова настапи со виолина, придружувана од пијанистката Соња Јованова, претставувајќи го елегантниот „Менует во G-dur“, нумера што ги истакна префинетото музичирање и совршена усогласеност. Љубителите на дувачките инструменти ги воодушеви професорот Костадин Издушнов на кларинет, повторно со придружба на Јованова, со динамичната изведба на „Соната оп. 49, бр. 1- Рондо“. Пијанистичкиот репертоар беше дополнително збогатен со настапот на професорот Душко Лазаров, кој ја претстави „Соната оп. 14, бр. 2- прв став“, осветлувајќи ги нејзините контрасти и архитектонска прецизност. Особено впечатлива беше и флејтистката. проф. Сузана Стефанова со вториот став од „Соната оп. 13, бр. 8“, дело кое ѝ овозможи да ја покаже топлината и мекоста на инструментот. Финалето му припадна на професорот Александар Лазаров, чија интерпретација на првиот став од истата соната („Патетична“) остави силен, драматичен завршеток на вечерта.
Поддржан од Општина Гевгелија, Концертот претставуваше повеќе од обичен музички настан- беше потсетник дека музичкото образование, творештвото и јавната културна сцена можат да создадат моменти што се паметат долго. ООМУ „Васо Карајанов“ уште еднаш го потврди својот статус како важен двигател на културниот развој на градот. Публиката си замина со чувство дека присуствувала на вечер каде што генерациите се спојуваат, а музиката станува заеднички јазик што ги обединува сите присутни во исто доживување и емоција.
