Дводневно духовно, богослужбено и културно-уметничко чествување по повод патрониот празник и 130-годишниот јубилеј од постоењето на храмот „Свети Кирил и Методиј“ ќе се одржи на 23 и 24 мај 2026 година во Гевгелија. Свеченоста е во организација на МПЦ- ОА Повардарска Епархија, Гевгелиското архиерејско намесништво, црковното настојателство при храмот „Свети Кирил и Методиј“ и кумовите домаќини за 2026 година, кои и оваа година подготвија богата програма за достоинствено чествување на сесловенските просветители и основоположници на словенската писменост и духовност.
Одбележувањето на празникот ќе започне во сабота, 23 мај, со почеток во 18:00 часот, кога во храмот ќе се одржи Акатист со петолебие, како молитвено духовно собрание во чест на светителите. По тој повод, верниците ќе можат да донесат пет лепчиња, неварена пченица, црно вино и зејтин, кои ќе бидат благословени за здравје, мир и благосостојба на семејствата.
Во продолжение на вечерната програма, со почеток во 19:00 часот, ќе се одржи богата културно-уметничка вечер исполнета со духовна музика, традиционален мелос, хорски изведби и македонски фолклор. Пред присутните ќе настапат: Боркица Мурцева, хорот „Владо Кантарџиев“, Детската танцова група, „Распеани гевгеличани“ и Aнсамблот „Бојмија“, кои преку своите изведби ќе придонесат за создавање свечена и празнична атмосфера.
Публиката ќе има можност да ужива во изведби на духовни и традиционални македонски песни, како и во фолклорни кореографии и сценски настапи што ја негуваат македонската култура, традиција и музичко наследство. Посебен белег на вечерта ќе дадат настапите на најмладите учесници, кои преку песна и игра ќе ја пренесат празничната порака за заедништво, љубов и почитување на духовните вредности.
Централното празнување ќе продолжи во недела, 24 мај, кога ќе се одржат повеќе богослужби и свечености во чест на патроните на храмот. Програмата започнува во 07:00 часот со Празнична Утрена богослужба, а во 08:30 часот ќе се служи Света Божествена литургија, на која верниците заеднички ќе упатат молитви за духовен мир, здравје и благослов.
Во 10:00 часот, ќе се изврши благословување на кумските колачи, додека во 11:00 часот низ улиците на Гевгелија ќе помине празничната литија, како симбол на верата, заедништвото и почитта кон светите браќа Кирил и Методиј. Веднаш потоа, од 11:30 часот, ќе следува настап на Ансамблот „Македонија“, кој со сплет од македонски ора и песни ќе го збогати централниот дел од прославата, а свеченоста ќе заврши со заеднички свечен ручек во 12:30 часот.
Организаторите упатуваат отворена покана до сите граѓани, верници и почитувачи на духовното и културното наследство да бидат дел од оваа свеченост и заеднички да го одбележат празникот посветен на Светите Кирил и Методиј и 130-годишниот јубилеј од постоењето на храмот.
Настанот е поддржан од Општина Гевгелија.
