Во исполнетата Уметничка галерија „Амам“, на 27 ноември 2025 година, беше отворено третото издание на Изложбата „НарАРТива“, еден од многуте културни настани во рамки на ноемвриската програма за „Гевгелија град на култура за 2025 година“. Настанот, кој стана традиционална точка на средба меѓу литературата и ликовната уметност, го организира ЈОУ Библиотека „Гоце Делчев“ во соработка со НУ Музеј- Гевгелија.
Годинешното издание, поставено под мотото „Кога зракот го допира стихот“, ја истакнува суштината на концептот што ја следи изложбата – идејата поетскиот збор да стане визуелен импулс, а ликовната уметност да го трансформира стихот во боја, светлина и форма.
Изложбата беше свечено отворена од Стефан Марковски, директор на Библиотеката „Гоце Делчев“, кој се обрати пред присутните со порака за значењето на меѓуинституционалната соработка и улогата на современата уметност во културниот развој на градот.
На отворањето се обрати и Александар Каракабаков, кој се јави во улога на куратор, кустос-советник и историчар на уметност. Тој го претстави концептот на ова издание на „НарАРТива“, нагласувајќи дека интермедијалноста- спојот на поезија и визуелна интерпретација- претставува силен уметнички јазик што создава нови слоеви значење и комуникација меѓу уметникот и публиката.
На Изложбата учествуваат реномирани автори од различни генерации и изразни поетики: Владимир Илиевски, Мирјана Крстева Массетти, Перо Кованцалиев, Вангел Срнаков, Никола Пијанманов, Ване Костуранов, Славица Милева, Александар Јанев, Љупка Галазска- Василев и Габриела Стахурска Гошева. Секое дело претставува визуелна рефлексија на избран поетски фрагмент, овозможувајќи ново читање на литературата- преку линија, текстура, симбол, апстракција или фигуративен пристап.
Публиката имаше можност да го следи дијалогот меѓу стихот и сликата, меѓу внатрешната поетска атмосфера и нејзиното уметничко значење. Како дел од големата културна програма што ја реализира Општина Гевгелија во рамки на титулата „Град на културата за 2025 година“, „НарАРТива“ се наметнува како значајна годишна културна точка што го унапредува современото творештво и ја збогатува локалната културна сцена.
Преку интермедијалниот пристап, Изложбата ја потврдува определбата на општината за поддршка на современите уметнички практики, афирмира автори и истовремено создава платформа за нови креативни соработки, потенцирајќи го културниот идентитет на Гевгелија во национален контекст.
Настанот заврши во атмосфера на споделена инспирација, а бројната публика и уметничката заедница ја актуелизираа пораката дека поезијата и визуелната уметност можат заедно да создадат моќен културен свет на заедничка имагинација.
powered by Borlabs Cookie 